رۆژی 12/2/2012 گرووپێك لە قوتابیانی كورد كە بۆ خوێندنی باڵا چوونەتە هیندستان، بە سەما و هەڵپەڕكێی كوردی بەشدارییان لە فیستیڤاڵێك كرد كە بۆ 30 گرووپ لە زانكۆی بەهاراتی رێكخرابوو.

تاریق حەمەئەمین، خوێندكاری ماستەر لە زانكۆی بەهاراتی، كە یەكێكبوو لەو قوتابیە كوردانەی بەشداری لە فیستیڤاڵەكەدا كرد، بە (رووداو)ی گوت “لە مانگی ئابی 2011 بە رەسمی بانگكراین بۆ ئاهەنگی گەورەی زانكۆی بەهاراتی كە نزیكەی 30 گرووپی گۆرانی هیندی تێیدا بەشداربوون، ئەو گرووپانە رۆڵیان بینیوە لە فیلمە بەنێوبانگەكانی بۆلیۆددا و دەستخۆشییان لێكردین”، ئەو گرووپەی كورد هەڵپەڕكێی شێخانی و مەریوانی نمایشكرد.

د.پاتانگرو كادام، سەرۆكی زانكۆی بەهاراتی، سەرسامی خۆی بە هەڵپەڕكێی كوردی دەربڕی و لە لێدوانێكدا بۆ (رووداو) گوتی “زۆر بە كورد خۆشحاڵبووم، بە گرووپی هەڵپەڕكێیەكەشیان”.

دەرهێنەری فیلمی (هەڵەبجە) كە بڕیارە هونەرمەندی نێوداری كورد مەحسون قرمزی گول، بەرهەمی بێنێ، دەڵێ ئەو نەیگوتووە كە جۆلیا رۆبەرتس، ئەنجلینا جولی، سەلما حایك وەك ئەكتەر رۆڵ لەو فیلمەدا دەبینن.

موراد تۆكات، دەرهێنەری فیلمی هەڵەبجە بە(رووداو)ی راگەیاند، سیناریۆی فلیمەكە لەوانەیە تاوەكو چوار مانگی دیكە تەواوببێ، لەگەڵ كاركردن لەسیناریۆكە كار بۆ كۆكردنەوەی بەڵگەنامەكانی كارەساتی هەڵەبجەش دەكەن.

دروستكردنی فیلمێك لەسەر هەڵەبجە دوای تێپەڕبوونی 24 ساڵ بەسەر كیمیابارانكردنی شارەكەدا دێت، ئەوە یەكەمین فیلم نییە لەسەر كارەساتی ئەو شارە دروستكرابێ، بەڵام یەكەمجارە هونەرمەندێكی كورد لە باكووری كوردستان كار بۆ دروستكردنی فیلمێكی تایبەت و درێژ بكات لەبارەیەوە.

دەرهێنەری فیلمی هەڵەبجە لەبارەی بیرۆكەی فیلمەكەیان دەڵێ “چەندین ساڵە بیرۆكەی ئەو فلیمە لە مێشكی قرمزی گول گەڵاڵە بووە. مەحسون پێیوایە هێشتا جیهان نازانێ لە هەڵەبجە چی روویداوە. بۆیە هەوڵدەدا بارودۆخی نەوەی دوای كارەساتی 1988 بگەیێنێتە رای گشتی جیهان”.

رۆژنامەی (سەباح)ی توركی، كە هەواڵی دروستكردنی فیلمی هەڵەبجەی بڵاوكردەوە، نووسیبووی ئەستێرە سینەماییەكانی وەك (جۆلیا رۆبەرتی، ئەنجلینا جولی، سەلما حایك) تێیدا بەشدار دەبن. بەڵام تۆكات لە درێژەی قسەكانیدا بۆ (رووداو) گوتی”ئەو رۆژنامەیە لەخۆیەوە ئەوەی بەناوی منەوە نووسیووە، بەڵام لەبەرئەوەی ئەو فلیمە بۆ هەموو جیهان نمایش دەكرێت و پەیامەكانی رەهەندی مرۆڤایەتی هەیە، هەروەها بۆ ئەوەی جیهان بزانێ لە هەڵەبجە چی روویداوە، پێویستە چەند ئەكتەرێكی نێوداری جیهانی تێیدا بەشداربكەین”.

تۆكات نایەوێ ئێستا ناوی ئەو ئەكتەرانە ئاشكرابكات كە بڕیارە لە فیلمی هەڵەبجەدا رۆڵ ببینن “تاوەكو سیناریۆیەكەی تەواو نەبێ نە ئەو ئەكتەرانە قسەیان دەبێ، نە ئێمەش داوایان لێدەكەین. لەوانەیە هەندێك لەو ناوانەی باسكراون لەنێو فلیمەكە رۆڵبگێڕن”.

مەحسون قرمزی گول و موراد تۆكات پێكەوە فیلمی (پێنج منارەكەی نیویۆرك)یان دروستكرد، كە باسی تیرۆر وەك دیاردەیەكی جیهانی دەكات، ئەوە نێوبانگێكی باشی بۆ پەیداكردن لەنێوەندی هونەری سینەماییدا، بۆیە چاوەڕواندەكرێ فلیمی هەڵەبجەش دەنگدانەوەیەكی زۆری هەبێ، هەروەها هەردووكیان كۆمپانیای بۆیوت بۆ بەرهەمهێنانیان دامەزراندووە، كە تائێستا چەندین فیلمی بەرهەمهێناوە وەك (Güneşi Gördüm ،  Romantik Komedi، Gecenin Kanatları و New York‌ta Beş Minare ).
موراد تۆكات دەرهێنەری فلیمی هەڵەبجە گوتی “دەمانەوێ هەموو سەرەداوەكانی فیلمی هەڵەبجە بگەیێنینە جیهان. هەوڵدەدەین هۆكارەكانی روودانی ئەو كارەساتە كە لە بوونی كێشەی كوردەوە سەرچاوە دەگرێ زەق بكەینەوە”، هەروەها لەبارەی جیاوازی فلیمی هەڵەبجەو پێنج منارەكەی نیویۆرك گوتی “چیرۆكەكانیان جیاوازن، بەڵام نێوەڕۆكی هەردووكیان باسی كارەسات و مەینەتییەكانی مرۆڤایەتی دەكەن”.

قرمزی گول دەچێتە سلێمانی

هەرچەندە رۆژنامەكانی توركیا هەواڵی چوونی قرمزی گولیان بۆ سلێمانی خستبووە دوای گەڕانەوەی تاڵەبانی بۆ سلێمانی كە ئەوكات بۆ چارەسەری نەخۆشییەكەی لە وڵاتی ئەڵمانیا بوو، بەڵام موراد تۆكات بەبێ ئەوەی روونكردنەوەی زۆر بدات لەسەر سەردانەكەی قرمزی گول گوتی “دوای تەواوبوونی سیناریۆیەكە لەوانەیە مەحسون سەردانی سلێمانی بكات”.